الفرق بيت اهل الاسكندريه واهل القاهره

يا جماعة انا عامل الموضوع دا للمرح مش اكتر

و مع احترامى لكل المصاروه يعنى الناس الى من القاهرة بس باللغه الاسكندرانى




فى القاهره : ايه ده الحاجه دى "جامده اخر حاجه"

فى اسكندريه : ايوووه الحاجه دى جامده اوى

فى القاهره : انا مش نمت من امبارح "تحس انك بتكلم طفل"

فى اسكندريه : انا منمتش من امبارح "ناس جد الجد"

فى القاهره : انا هشوف الموضوع ده

فى اسكندريه : انا حشوف الموضوع ده

فى القاهره : استيكــه "اللغه العربيه واخده حقها شويه معاكم" وقال كمان مساحه "بلدى بلدى يعنى"

فى اسكندريه : جومه عادى خالص جومه

فى القاهره : صباعى "ياعينى عليك يابنى"

فى اسكندريه : صوبعى اهى مفيهاش مشكله فله شمعه منوره اهى

فى القاهره : الاهلي عمل ايه النهارده الاجابه كيسب

فى اسكندريه : عادى الاهلي كسب ليه نزود حروف وخلاص مش لما نقدر على الكام حرف اللى عندنا نبقى نزود

فى القاهره : جلابيه "كلمه مبالغ فيها"

فى اسكندريه : عبايه او اوفطان"زى الفل"


فى القاهره : يقولك ميكروباص "ثقافتك انجليزى اوى يا عمنا MICRO BUS"

فى اسكندريه : بنقول مشروع "شجع لغه بلدك"

فى القاهره : قال ايه اوطه يااااااااااااااى "دى كلمه من السبيعينات اصلا واتلغت بقالها "100سنه

فى اسكندريه : طماطم "جايه من كلمه توماتوز يا جماعه لازم يكون عندك ثقافه انجليزى برضه"

فى القاهره : خمسين قرش "الرياضه واخده معاكم حقها اوى يا اخواتى"

فى اسكندريه : نص جنى "اهى يا جدعان فيها ايه زى العسل اهى"

فى القاهره : قال ايه يا اخويا يقولولك لبان " والنبى انا لو دخلت سوبر ماركت اقوله هات لبانه ليكرشنى بره وبالمناسبه

يكرشني دي ف القاهره اسمها يطردني "

فى اسكندريه : مستيكه "شايفين الاسم كله مازيكا"

ف القارهره : بيقولو اتخانقنا

ف الاسكندريه : بيقولو اتعاركناا وطبعا دي اجمل بكتييييييييييير

فى القاهره : (سد الحنك) على رأى عادل امام يا خراااااااااااابى وبيجيلكم نفس تاكلو حاجه اسمها كده

فى اسكندريه : (حلاوه دقيق) شايفين الاسم متدلع ازاى يعنى دى الحلاوه بتاعه الدقيق

فى القاهره : يقولولك ايه (جبنه نستو) نستو ده اصلا كان فراش فى مدرسه الانشطار النووى الاعداديه بنات

فى الاسكندريه : جبنه مثلثات عادى ماهى شكلها كده مش بنتفلسف احنا

فى القاهره : (جبنه رومى) دى على اساس انها بنت عم الديك الرومى

فى اسكندريه : الجبنه مصدرها من تركيا يبقى اسمها جبنه تركى ولا ايه يا جماعه

فى القاهره : قال ايه طعميه ويجى واحد يتفلسف ويكتبلك طع100 ناس فاضيه

فى اسكندريه : فلافل معروفه طول عمرها زى ما فى روميو وجوليت فيه فول وفلافل

فى القاهره : يقولوا ايه فول بالزيت حار "اكيد بيجيبو الزيت ده من العربيات

فى اسكندريه : فول بالزيت والليمون مش بنحب ننكر حق حد زي ما نقول الزيت نقول الليمون

فى القاهره : يقولك ايه على البمبونى (ارواح) انتم الاطفال عندك طالعين من بيت الرعب ولا ايه عادى دى المفروض

حاجه للاطفال يعنى اسمها يبقى لايت بمبونى زى عندنا فى اسكندريه


طبعا مع احترامى لكل اهالى القاهرة الكرام

والله كل واحد وحسب ماتعود
وإنتي لوكنتي من القاهره أو عايشة فيها كنت هتقولي زي مابيقولوا
إضافة إلى ذلك إلي إنت كتباه يبين إنا إحنا كلمتنا
احسن وأصوب بكتير
وهي دي لغة المصريين عموما

اولا انا ولد ثانيا انا من اسكندرية يعنى مش غريب عن مصر هععععععععععععععع

واقولك شى انا بعتز بلغة اهلى اهل اليكس ثم الموضوع ده مجرد للترفيه مدختيش الموضوع كانه شخصى

وع العموم اسعدنى مرورك

احثن ناس ومنورة الموضوع